Marketing
HUMANITARNI KONCERT
Mene brine kada mi telefon ne zvoni, jer ovo koliko meni telefon zvoni, ne zvoni niti na telefonskoj centrali, pa mi žena govori da triban zaposlit sekretaricu, ka će se javjat na telefon.
Između svih ostalih poziva, evo i poziva ki se naslanja na sve one čakule sa mojim prijatejen o kima san pisa na ovon blogu.
- Ca je kumpare, ni te bilo u Opatiju na koncert, ja san misli da ćeš ti bit pervi na ton koncertu, koliko si govori i pisa o tome kako svi na otoku moramo bit zajedno, kako svi moramo puhat u jedan tratur.
- Da si pismen onda bi pročita zac se nisan uključi u taj projekt, a još uvik podupiren da se to zajedništvo ca više oderži. To zajedništvo, kumapre moj more se oderžat za sada samo pismom, jer još uvik smo u dvi županije, u dvi biskupije, još uvik bismo iskopali oci jedni drugima, oće cjev od vode proć prije kroz Novaju ili Povjanu. Svaki pocetak je teški i ja ga podupiren, ali svoje aktivnosti ono ca cinin već trejset i još ko godišće gori, nebi pusti za niko zajedništvo na otoku, pa cagod ki misli o tome.
- To te razumin i drago mi je bilo vidit, da si opet u sportu, na koncu to si i zasluži.
- Ca ti cini ovaj ministar?
- Cini to da više nećeš moć zvat Bebiću, moran doć na terapiju, nego ćeš stat u filu i upisat se u libar, pa ćemo se za jedno godišće dan opet vidit. Zato ovaj telefon ne prestaje zvonit celi dan, ko da san ja ministar.
- Minjaj ministra.
- Ti ćeš ga prominit sada kada budu drugi izbori, a ja ću te pokumpanjat. Nisi mi reka kako ti je bilo u Opatiju?
- Ca da ti recen. Lipo je to bilo vidit i uživat u tome, zato mi je žal da nisi ti bi na to druženje, morebit bimo bili i zapivali. Lipo je i ca su se skupili šoldi za Dječiju bolnicu na Kantridi.
- Ca moreš? bit će vrimena za druženje.
- Greš za Uskers doli?
- Verujen da ću se organizirat poć doli ako mi obaveze dozvole, jer nisan bi od svih sveti doli. Mat se već zaželila vidit ovoga maloga.
- Onda u Stinicu i stani u filu za trajekt.
- Malo sutra, ja se deržin one stare "gren, okolo", boje nego u filu stat.
- Bojin se da ću i ja "okolo", pa se morebit vidimo u Pag, ala stoj mi dobro.
- Bog i pivaj nakanat.
Post je objavljen 19.03.2014. u 12:06 sati.