Marketing
Litnja fešta o'maškar AD MMXIII
Posli onega praznika za nepce, ovogodišnjega Mašošefa, nikako mi se nije dalo odit na drugu feštu, ali ča ću. mora san, obeća san mojoj ekipi iz KPU Kampanel da ću doć napisat dva slova i potegnit dvi slike. Uvik, bar u zadnje vrime, dođen na feštu još za dana, da snimin zadnje pripreme ... ovi put san malo okasnija, jema san zato više nego oprtavdane razloge, rekla bi mi Marijana da radin PR za promociju.
Kad san se pojavija, vidilo se dobro da nas je sve, od Buiša pa dalje, bilo dobro ispripadalo sa vrimenskon prognozon. Lako je sad zvizdit, ali meni je bilo ništo ka sumjivo čin su se sa vrimenskon prognozon, osin dokazani igrači ka Vakula i ekipa, počeli bavit i novinari i „novinari“ opće prakse, koji od računa za kapučino u najskupjemu kafiću na Stradunu začas napravidu mirakul, a di neće od malo nevere. Čak su mi, kad san radija blokove za spizu, piće i lutriju, rekli da ne mećen datum nego samo godinu, ka ono ako budedu morali odgodit.
Dunkve, prvi mačići se učidu plivat, ka i prvi utiscu, koji nisu baš nagovještavali dupke punu Rivu ...
... ali ekipa iz Maškar se nije dala smest. Uz standardnu ekipu sa druge strane šanka ...
... i sa vrljačon u ruci, pogotovo se to odnosi na izgubljenoga sina Pelu ...
... rezultat nije moga izostat:
... čak su i čevapi, koje su držali u teči osvojenoj na ovogodišnjemu Mašošefu jemali malo lipši okus. Svit se pomalo počeja skupljat, kad su vidili da neće buit ni krupe ni pijavic ...
Najprin su „stradale“ srdele i tunjevina. Buiš još buba glavon kako nisu osigurali bar srdel duplo više, ali svega je nestalo ... na kraju je, bar oko deset i po, bilo zar još samo rižota ostalo, a čule su se neke glasine da će se kuvat druga tura ...
Nisan osta da glasine provjerin, jerbo san već bija na po koplja. A glede slikavanja, deboto da nisan triba njanci dolazit, puna Riva Lupina i paparazzi ...
... nisi moga uteč sad kad bi tija. Jedino, ništo mi je ka falilo. Reka je jedan čovik da nigdi nima veterani ... kako nima, evo is trojica, i to iz više sportova ...
A bome nije falilo ni živopisni likova iz dijaspore ...
Za glazbeni program se pobrigala ekipa iz „Ritma kiše“ ...
... koji su svirali pisme ča i volidu slušat i dide i unuci ...
Sve u svemu bila je to još jedna lipa, ugodna litnja fešta ... dovidova do iduće. Zdravi i veseli bili! 
Post je objavljen 11.08.2013. u 00:58 sati.