Marketing
LA KOSTA
LIPI MOJI
Kad za 200 lit povjesničari i historičari budu proučavali uva moja pisma će reći: »Uvi je jušto bija infišan z misecon marčon«. Altroke infišan, altroke »Ako Velja veljuje, Marač ne vraguje«, altroke »Marač ima devet pensiri na dan«. Ste vidili ča nan, hudoba, dela: ne moliva, jušto se kaprica z ljudi. A z koliko dela smo uzad u brajdami, sam Bog će znati? Jebe se njemu ča je prvi dan proljeća pasa!
Pita me moja mala unuka Samanta, sunce didovo: »Didić moj, kakav je to prvi dan proljeća, ako sam još u zimskoj vintjakni?« Dite moje – njoj govorin: Vrime, guzica i pulitičari delaju vajk ča će oni!
U Puli, na pjacu Foro su dopeljali cilu montanju unih lipih škril i saliži z Bulevara. Si pensan: lipo, pametno, će ganbijati na placi une grote ke su se razbile. Ma u torak vidin da te škrile jopet z velikin buldožderi krgaju na velike kamijone. Kamo hi sad to nazad prihitivaju – pitan Francija? »Lako more biti u Ninovo selo Sveti Jure-San Đorđo, jušto mu hi još toliko fali da hi poslaže do unih ča je uza z Porta rate, pak da si konpletira prilazni put.«
Kad smo već poli Jakovčića, padaju mi na pamet una moja tri porečka nerista Prodan, Bugarin i Orlić, takozvani satiričari iz La kosti. Ma, pero, kad rabi zapisati kako naš župan mešetari u Poreču, ki je Porečan kako i oni, delaju fintu-de-mona. I da mu uni isti Kos, prvi IDS-ovac Poreča, ki mu je rušija podrum gori u Sveten Juri, sad, za konpenzaciju - zida šofit. To moji satiričari ne vide. Pak mora đornališta iz Pule doj upraviti delo. Takovi su Porečani, kurbe od ljudi, tobože su jeni proti drugih, ma kad zagusti se drže skupa.
Čujen u TV-dnevniku i štijen po đornali da nan se jopet reorganiziraju tajne službe. Umisto dosadašnjih SIS, CIC i PIC nova tajna služba će se zvati SOA. Bilo bi bolje da se zove – SOVA. Lipi moj Kara Marko, kako ti od starega kadra moreš delati novu službu. Nikako! Špije su vajka špije. Ter i danas, ti mladi agenti sve pitaju nas, ki smo prid po šekula delali u UDBI i KOSU. Kako stvari stoje, ko uvako pojdemo naprid, po glavi stanovnika ćemo imati dva tajna agenta.
Ma si vidija ti njih, to njihovo poštenje, ta njihova pulitka? Kape samo svoju! Ti naši popi, ta naša bezgrišna crikva. Ma ča je priko mire – je priko mire. U Varaždinu bi hitili studente na čestu, perke da je zgrada bila njihova. Amen Bože! Vizitaciju ku je učinija pomoćnik zagrebačkega biskupa je pokazala kako u Caritasu u Brezovici ni bilo zlostavljanje dice. Amen Bože! Forši za pope pedofilija ne spada u zlostavljanje dice. Ča uzoriti viziter ni proštija Dnevnik karitasovega kuhara iz Brezovice, književno djelo ko po svojoj kvaliteti more stati zuz libre markiza De Sada. Pak sada još i uvi Uvaženi Velemožni Pater Recidivist Tonči Trstenjak, urednik religijskih programa na HTV, ki je da otkaz šinjori Dubravki Naumovski, TV-prevoditeljici ka simultano z prsti prevodi svete mise za gluhonjeme. Zašto? Zato ča se – rastavila od muža. Amen Bože! Dobro da njoj ni reka da je kurba. Pak se pitan, su ili nisu ti naši popi, fratri i pateri čitali Sveto pismo, znaju oni za Isusov nauk. Neka se domisle ča je Isukrst reka unima ki su hitali grote na Mandalenu. A šinjora Dubravka je svetica kontra Mandaleni.
Učer je bija Međunarodni dan proti rasizma. Pak se pitan, Bože mi uprosti, kamo ćeš hujega rasizma?
Prikosinoć je u Karlovcu dištružen još jedan spomenik NOB, to je 3500.-ti zrušen spomenik partizanima. Još jedan dokaz koliko je Hrvacka u svojoj noćnoj intimi - antifašistička država.
Ben, da finin z marčon, ili ča bi naši rekli z ožujkon, kako san i počeja. Šjora Mafalda govori: »Marco porčerelo, vedi il sole, porta l'ombrelo«. Dajte si kuraja, vajka z vami vaš
Zvane Lakodelac
NINO NAŠ NE DAJ SE!!!!!
SELO MOGU RUŠIT,ALI TEBE NE!!!
BREZOVAČKA ČUVANA TAJNA!!!!
NAKON SVIH TIH RUŽNIH DOGAĐANJA,
I KIŠOVITOG MARTA EVO NEK NAM
ZASIJA I ZLATNO SUNCE...
Post je objavljen 23.03.2006. u 11:53 sati.